|
dashAnanAditimiraparibhUtamidaM jagat||
prasasAda yatastasmai kasmaicinmahase namaH||1||
kANAdasA~gkhyAyurvedatantrANAM pAradRushvanaH ||
tAtasyAnantasenasya vande caraNapa~gkajam|| 2 ||
mahadAdinikAyo~ayaM yasyAH prAdurabhUta kila||
satIM guNamayIM bhaktyA bhairavIM jananIM bhaje|| 3 ||
racitashcakradattena yo dravyaguNasa~ggrahaH||
shrImatA shivadAsena tasya vyAkhyA~abhidhIyate|| 4 ||
noktAshcakreNa ye dravyaguNA vistarabhIruNA||
te~api prasa~ggato lekhyAH shiShyavyutpattaye mayA|| 5 ||
anibaddhasyApi iShTadevatAnamaskArasya vighnavAraNasamarthatvAt tannibandhanaM granthagauravamAtramAvahatIti kRutamapi namaskAraM granthAdau anibadhya shiShyapravRuttya~ggatayA abhidheyasambandhaprayojanAnyeva tAvadAha– prAya ityAdi| dravyaguNasa~ggraha iti yadyapi madhurAdirasAnAM tathA chAyAtamasoshcAdravyabhUtayorapi guNA atra vAcyAstathApi dravyapadaM ‘chatriNo gacchanti’ iti nyAyena samarthanIyam; kiMvA dravyANi guNAshca dravyaguNAH teShAM sa~ggrahaH sa~gkShepeNa taddharmapratipAdakaM vacanam| asmin pakShe~api chAyAtamasordravyatvaM mImAMsakamatamAshritya samarthanIyaM, sarvapAriShadatvAt vaidyakashAstrasya|
yaduktam– "tamastabhAlamAlAbhaM calatIti pratIyate| rUpavattvAt kriyAvatvAt dravyaM tu dashamaM ca tat" iti| anye tu, adravyabhUtAnAM rasAdInAM ye guNA vAcyAsteShAmaupacArikatvena apradhAnatvAt atrAnupagraha ityAhuH| iha ca dravyaguNA abhidheyAH, taiH samaM granthasyAbhidhAnAbhidheyalakShaNaH sambandhaH, prayojanaM ca dravyaguNaj~jAnaM mukhyaprayojanaM ca cikitsitamiti| dhAraNamiti shabdataH, smaraNamityarthataH| iha yadyapi Ashrayatvena dravyameva pradhAnaM tathA~api dravyasya svakAryajanakatvaM prAyo rasAdidvArakameveti rasavIryavipAkaguNA eva prathamato vAcyAH; tatrApi rasAdhInatvAt vIryasya, vIryAdhInatvAcca vipAkasya, vIryAt pUrvaM rasaH, vipAkAt pUrvaM ca vIryaM nirUpaNIyam| uktaM cai– "pAko nAsti vinA vIryAd, vIryaM nAsti vinA rasAt" iti (su. sU. 40)| tatra yAvadrasasvarUpaM na j~jAyate tAvat tadvisheShadharmAH kathaM j~jeyA iti lakShaNataH kAraNataH sa~gkhyAtashca raso~abhinirUpyate| tatra rasasAmAnyalakShaNaM, yadAha carakaH– ‘rasanArtho rasaH' iti (ca. sU. 1)| rasanendriyagrAhyo yo~arthaH sa rasa iti lakShaNArthaH| "etacca ShaNNAmapi rasAnAmanugataM rUpAdiShu ca vyAvRuttatvAt sAdhu lakShaNam" iti cakraH| asmatpitRucaraNAstu "yathAshrutametallakShaNaM rasatve rasAbhAve cAtivyApakaM, tayorapi rasanendriyagrAhyatvAt, tathA atIndriyarase ca avyApakam, tasmAt "rasanendriyagrAhyavRuttiguNatvAvAntarajAtimattvaM rasatvam' iti lakShaNaM bodhyam" ityAhuH| nanu, "ApyorasaH" iti (su. sU. 42) sushrutenoktaM tatra vipratipadyAmahe- yadyApyo rasastarhi kathaM pArthivadravyeShu rasopalambha iti prathamA vipratipattiH, dvitIyA tu yadyApya eva rasastarhi apAmavyaktarasatvena madhurAdivisheShotpAdo nopapadyata iti; atha ‘pA~jcabhautikatvameva rasasya' iti manyase; tadapi nopapadyate, tejovAyvAkAshAnAM nIrasatvAt rasaM prati kAraNatvAnupapatteH| atrAhuH– yadi ApyApya eva rasastathA~api uttarottarabhUteShu pUrvapUrvabhUtaguNAnupraveshAt rasavattvaM pRuthivyAmapyupapadyate| ata evoktaM "viShTaM hyaparaM pareNa" iti (nyA. da. a. 3. A.1, sU. 66)| asyArthaH aparaM pUrvaM bhUtaM pareNa bhUtenAnupraviShTam| tena shabdaguNasyAkAshasya vAyau anupraveshAt vAyorapi shabdavattvam, sparshaguNatvaM ca svata eva; evaM vAyostejasi anupraveshAt tejaH shabdasparsharUpaguNam; tejaso~api jale~anupraveshAt jalaM shabdasparsharUparasaguNam; evaM jalasya ca pRuthivyAmanupraveshAt pRuthivI ca shabdasparsharUparasagandhaguNA iti j~jeyam| katidhApurUShIye~apyuktam -"mahAbhUtAni khaM vAyuragnirApaH kShitistathA| shabdaH sparshashca rUpaM ca raso gandhashca tadguNAH|| teShAmekaguNaH pUrvo guNavRuddhiH pare pare| pUrvaH pUrvaguNashcaiva kramasho guNiShu smRutaH" iti ( ca. shA. 1)| asyArthaH– teShAM khAdInAM madhye pUrvaH svarUpa ekaguNaH shabdaikaguNa ityarthaH pare pare uttarottaraM guNavRuddhirityarthaH; yathA– khamekaguNaM, vAyurdviguNaH, agnistriguNa ityAdi| nanu, guNavRuddhimAtramityuktaM, etAvatA ekaguNatvadviguNatvAdiniyamo na j~jAyate ko vA guNaH kutra bhUte ityata Aha– pUrva ityAdi| khAdiShu guNiShu kramasho yathAsa~gkhyaM pUrvo guNaH shabdAdirvartate, yathA– khe shbdaH vAyau sparsha ityAdi| gandhastu yadyapyuttaraH guNAntarAbhAvAt pUrvo na bhavati tathApi ‘chatriNo gacchanti’ iti nyAyena apUrvasyApi pUrvatvaM samarthanIyam| na kevalaM pUrvo guNo vartate kintu pUrvaguNashca pUrvasya bhUtasyApi yo guNaH so~apyuttarabhUte vartata ityAha– pUrvaguNashceti| tena vAyau sparsho naisargikaH, pUrvasya AkAshasya yo guNaH shabdaH so~api vAyau iti dviguNatvaM; evamagnau rUpaM naisargikaM shabdasparshau ca pUrvabhUtaguNau iti triguNatvaM; evamanyatrApi| nacaivaM sarva eva guNAH sarveShAmeva prasajyeran tatkathamApyo rasa iti vAcyam, teShu teShu bhUteShu tattadguNAnupraveshe~apyutkarShAbhiprAyeNApyatvAdivyapadeshAt| yata AkAshAdhike dravye shabdo~adhikaH, tathA vAtAdhike dravye sparsho~adhikaH tathA tejo~adhike rUpamadhikaM jalAdhike ca raso~adhikaH, pRuthivyadhike ca gandho~adhika iti shabdAdInAmAkAshIyatvAdivyapadesha ityarthaH| tathA apAmavyaktarasatve~api bhUtAntarasambandhAt madhuratvAdivaijAtyamupapadyate| uktaM ca sukShutei– "sa khalvApyo rasaH sheShabhUtasaMsargAdvidagdhaH ShaDvidho bhavati" iti (su. sU. 42)|
asyArthaH– sa Apyo raso jalAdanyAni bhUtAni sheShabhUtAni teShAM saMsargAt vidagdhaH pariNataH kAlasahAyabhUmiviyadanilAnalasaMsargeNa pariNAmAntaraM gataH ShaTprakAro bhavatIti| tatra pRuthivyambuguNabAhulyAt madhuraH, toyAgniguNabAhulyAt amlaH, pRuthivyagniguNabAhulyAt lavaNaH, vAyvagniguNabAhulyAt kaTukaH, vAyvAkAshaguNabAhulyAt tiktaH, pRuthivyanilaguNabAhulyAt kaShAya iti|
nanu, yadi toyAgniguNabAhulyAdamlatA tarhi uShNajalasyApi amlatA kuto na syAt ? naiSha doShaH, nahi bhUtasaMsargamAtrAdeva rasavisheSho niShpadyate kintarhi vishiShTAM pariNatimapekShate; tadyathA– pArthivasyApi loShTrasyAgnitaptasya pRuthivyagniguNabAhulye~api na lavaNatA bhavati, lavaNatvasAdhanavishiShTavidAhAsambhavAditi| enamevArthaM shlokena kashcidAha– "toyAgniguNabAhulye~apyamlatvaM noShNavAriNaH| naikasmAdbhUtasaMyogAdvidAhAcca rasA yataH" iti| nanu, yadi sheShabhUtayogAnmadhurAdiShaDvidhatvaM tatkathaM pRuthivyambuguNabAhulyaM madhure~abhidhAya mudhure~api visheShe~apAM kAraNatvamucyate; atra vadanti– Apo rasAnAmAdhArakAraNaM, apAM pRuthivyAmanupraveshAt pRuthivyapi AdhArakAraNameva, tena jalakShitI api tadAdhAratayA rasAnAmabhivyaktau, abhivyakteshca madhurAdirUpatAmantareNa asambhavAt madhurAdivisheShe~api kAraNe bhavataH; agnyAdayastu trayo nIrasatayA madhurAdivisheShe nimittakAraNaM prAdhAnyena bhavanti, tavdyatirekeNa amlAdirasAbhAvAt; rasAbhivyakteshca agnyAdibhUtatrayasatridhAnaM vinA~anupalabdherabhivyaktau api kAraNatvamagnyAdInAM bhavati| taduktaM carakei– "rasanArtho rasastasya dravyamApaH kShitistathA| nirvRuttau ca visheShe ca pratyayAH khAdayastrayaH" iti (ca. sU. 1)| atra hi cakAradvayAt jalakShityorapi visheShe kAraNatvaM, tathA khAdInAM ca nirvRuttau api kAraNatvamuktaM; tena madhure visheShe~api apAM kAraNatvAt suShThUktaM ‘pRuthivyambuguNabAhulyAt madhuraH’ iti, evaM ‘toyAgniguNabAhulyAdamlaH’-ityapi samAdheyam| naca yathA bhUmitoyAdhikyAt madhuraH, evaM toyavAyvAdhikyAt bhUmyAkAshAdhikyAt vA rasAntarotpattiH kuto na syAditi vAcyam svabhAvasyAparyanuyojyatvAt; yataH pRuthivyAdibhUtAnAmevAyaM svabhAvaH– yat kenacideva bhUtAdhikyena vyavasthitA rasavisheShotpAdakAH na punaryatki~jcidbhUtAdhikyeneti| ata eva toyAgnyoH parasparavirodhAt kathamekakAryArambhakatvamityapi apAstamuktayuktereva| nanu ca, rasAnAM ShaDvidhatvamanupapannaM, antarIkShajalAdau avyaktasya saptamarasasyApi vidyamAnatvAt| naivaM, madhurAdInAmeva ShaNNAM tatra antarIkShajalAdau avyaktIbhAvena tasya avyaktarasasya madhurAdibhyo~abhinnatvAt| naca kShArasyApi rasatvAt saptamatvApattiriti vAcyaM, tasya kriyAguNayogena dravyatvAt; taduktaM carake- ‘kSharaNAt kShAro nAsau rasaH’ ityAdi (ca. sU. 26)| tatsahacaritasya lavaNa evAntarbhAvo, lavaNavargapAThAt| ete ca rasAH parasparasaMyogAt saptapa~jcAshadbhavanti, te punashcarakasushrutAdau avagantavyAH iha tu vistarabhayAnnoktAH||1||
|