|
kleshAdyairaparAmRuShTamaShTamUrtiM jagatpatim |
vibhumavyayamIshAnaM praNamya shashibhUShaNam ||1||
rasavIryavipAkAdyaiH siddhaH sadvaidyapUjitaH |
bhAvasvabhAvavAdo~ayamArShaH saMhriyate mayA ||2||
bhaiShajyAhAraceShTAnAM yo na vetti guNAguNam |
na sa vetti bhiShak samyak svasvAyuShyahitAhitam ||3||
ataH samastavastUnAM guNadoShavinishcayaH |
j~jAtavyo yatnataH sadbhirvaidyaiH parahitArthibhiH ||4||
sa~gkShiptaM granthamicchanti bhiShajo vistaradviShaH |
sa~gkShipto~ayamataH sUktaH suprayukto viracyate ||5||
vRuddhiM tulyaguNairbhAvairviparItaguNaiH kShayam |
yuktairyAntIti sa~gkShepaH sarvadA sarvadhAtavaH ||6||
shivA pa~jcarasAyuShyA cakShuShyA lavaNA sarA |
medhyoShNA dIpanI doShashothakuShThavraNApahA ||7||
shiro~akShipANDuhRudrogakAmalAgrahaNIgadAn |
vibandhaM srotasAM gulmamUrustambhamarocakam ||8||
harItakI hared vyAdhIMstAMstAMshca kaphavAtajAn |
tadvaddhAtrI visheSheNa vRuShyA shItA ca vIryataH ||9||
bhedanaM kaTu rUkShoShNaM vaisvaryakRuminAshanam |
cakShuShyaM svAdupAkyakShaM kaShAyaM kaphapittanut ||10||
triphalA kaphapittaghnI mehakuShThaharI sarA |
cakShuShyA dIpanI caiva viShamajvaranAshinI ||11||
kaphapittaharA rUkShA madhurA mRudurecanI |
vAtakRut kaTukA pAke kaShAyA trivRutA~aruNA ||12||
tasmAdalpAntaraguNA vij~jeyA trivRutA sitA |
jvarahRudrogavAtAsRugudAvartAdirogiShu ||13||
rAjavRukSho~adhikaM pathyo madurmadhurashItalaH |
tatphalaM madhuraM balyaM vAtapittApahRut saram ||14||
kaTukAhvA sarA rUkShA kaphapittajvarApahA |
trAyantI kaphapittasragulmajvaraharI sarA ||15||
kaphapittAsranucchardiviShaghnI tiktavalkalA |
yAsaH saro jvaracchardishleShmapittavisarpanut ||16||
pipAsAkAsapittAsrakaphapANDukShayApahaH |
bhUdhAtrI vAtakRuttiktA kaShAyA madhurA himA ||17||
khadiraH kuShThavIsarpamehapittakaphApahaH |
bhUnimbo vAtalo rUkShaH kaphapittajvarApahaH ||18||
nimbaH pittakaphacchardivraNahRullAsakuShThanut |
tatphalaM bhedanaM snigdhamuShNaM kuShThaharaM saram ||19||
mahAnimbaH paraM grAhI kaShAyo rUkShashItalaH |
parpaTaH pittatRuDdAhajvarajicchleShmashoShaNAH ||20||
pAThA~atIsArashUlaghnI kaphapittajvarApahA |
kuTajaH kaphapittAsratvagdoShArsho~atisArajit ||21||
tadbIjaM raktapittAtIsArajvaraharaM himam |
hrIberaM chardihRulAsatRuShNAtIsAranAshanam ||22||
kaphaghnaM tiktakaTukaM mustaM sa~ggrAhi pAcanam |
doShaghnaM pAcanaM grAhI tiktaM cAtiviShAdvayam ||23||
sa~ggrAhi kaphavAtaghnaM bilvaM dIpanapAcanam |
bAlaM vRuddhaM tridoShAya durjaraM pUtimArutam ||24||
kaphavAtAmashUlaghnI grAhiNI bilvapeshikA |
kaphAnilAmadurnAmabradhnashothodarApaham ||25||
citrako~agnisamaH pAke shothArshaHkRumikuShThahA |
saraM punarnavAyugmamuShNavIryaM rasAyanam ||26||
lohitaH kesharAgI ca kRumikuShThajvarApahaH |
tadvad dantI prabhAvAttu virecayati sA naram ||27||
kaphakRumiharI tIkShNA hastidantI virecanI |
jayapAlo guruH snigdho recI pittakaphApahaH ||28||
snuhI sAShThIlikAdhmAnagulmodaraharI sarA |
dUShIviShodaraplIhagulmakuShThapramehiShu ||29||
bahudoShe prayoktavyamagnitulyaM sudhApayaH |
hemAhvA recanI tiktA madAtyukleshakAriNI ||30||
kRumikaNDUkaphAnAhaviShakuShThavinAshinI |
arkaH kRumiharastIkShNaH saro~arshaHkuShThanAshanaH ||31||
tatpayaH kRumidoShaghnaM hitaM kuShThodarArshasAm |
aruShkaraM tvagnikaraM kaShAyaM kaTupAki ca ||32||
uShNaM kRumyudarAnAhashothadurnAmanAshanam |
tanmajjA madhuraH pAke vRuShyashcArshoharaH paraH ||33||
gugguluH picchilaH sparshe vishado~abhyavahArataH |
susvAduH sakaTustiktaH sakaShAyo rasAyanaH ||34||
vraNyaH svaryaH kaTuH pAke rUkShaH shlakShNo~agnidIpanaH |
kledamedo~anilashleShmagaNDamehApacIkRumIn ||35||
piDakAgranthishophAMshca hantyuShNaH sraMsano laghuH |
sa navo bRuMhaNo vRuShyaH purANastvapakarShaNaH ||36||
pAke sakShAramadhuro madhye madhurapicchilaH |
tIkShNoShNo lashunaH kande kaTupAkarasaH saraH ||37||
hRudyaH keshyo gururvRuShyaH snigdho dIpanarocanaH |
bhagnasandhAnakRud balyo raktapittapradUShaNaH ||38||
kilAsagulmakuShThArshomehakRumikaphAnilAn |
sahidhmApInasashvAsakAsAn hanti rasAyanaH ||39||
palANDurmadhuro vRuShyaH kaTuH snigdho~anilApahaH |
balyaH pittAvirodhI ca kaphahRudrocano guruH ||40||
snigdho ruciShyaH sthiradhAtukArI balyo~atha medhArucipuShTidashca |
svAdurguruH shoNitapittashastaH sapicchilaH kShIrapalANDuruktaH ||41||
tIkShNo gRu~jjanako grAhI grahaNyarshovikAranut |
shuShkAni kaphavAtaghnAnyetAnyeShAM phalAni tu ||42||
kaphAnilaharaM svaryaM vibandhAnAhashUlajit |
kaTUShNaM rocanaM vRuShyaM hRudyaM caivArdrakaM smRutam ||43||
vAtashleShmavibandheShu rasastasyopadishyate |
guDArdrakaM vAtaharaM cakShuShyaM pittanAshanam ||44||
kShataghnaM caiva vRuShyaM ca varcobhedi kaphApaham |
cakShuShyaM rocanaM svaryaM vikAsi viShadUShaNam ||45||
stambhATopAnilaghnaM ca karshanaM lavaNArdrakam |
kuShThe pANDvAmaye kRucchre raktapitte jvare vraNe ||46||
dAhe sharannidAghe ca naiva pUjitamArdrakam |
gaNDIrajalapippalyau tuburuH shRu~ggaverikA ||47||
tIkShNoShNakaTurUkShANi kaphavAtaharANi ca |
ArdrikA tiktamadhurA mUtralA raktapittakRut ||48||
nAgaraM kaphavAtaghnaM vipAke madhuraM kaTu |
vRuShyoShNaM rocanaM hRudyaM sasnehaM laghu dIpanam ||49||
snigdhoShNA madhurA vRuShyA kaTukA dIpanI sarA |
pippalI mArutashleShmakAsashvAsAn vinAshayet ||50||
shleShmalA svAdushItArdrA gurvI snigdhA ca pippalI |
sA shuShkA viparItA tu snigdhA vRuShyA rase kaTuH ||51||
svAdupAkA~anilashleShmashvAsakAsApahA sarA |
bhedanaM pippalImUlaM dIpanaM kRuminAshanam ||52||
pittaprakopi tIkShNoShNaM rUkShaM rocanadIpanam |
rase pAke ca kaTukaM kaphaghnaM maricaM laghu ||53||
cavikAgajapippalyau pippalImUlavat smRute |
baddhaviTsyandinI j~jeyA visheShAd gajapippalI ||54||
tryUShaNaM kaphamedoghnaM mehakuShThatvagAmayAn |
nihanyAddIpanaM gulmapInasAglyalpatAmapi ||55||
pippalIpippalImUlacavyacitrakanAgaraiH |
pa~jcakolamiti khyAtaM rUkShaM dIpanapAcanam ||56||
pa~jcakolaM kaphAnAhagulmashUlArucIrjayet |
maricena yutaM tattu ShaDUShaNamudIritam ||57||
laghUShNaM pAcanaM hi~ggu dIpanaM kaphavAtanut |
snigdhaM tIkShNaM kaTurasaM shUlAjIrNavibandhanut ||58||
tIkShNoShNaM kaTukaM pAke rucyaM pittAgnivardhanam |
bahushleShmAnilaharaM gandhADhyaM jIrakadvayam ||59||
kAravI shleShmavAtaghnI tadvaccaivopaku~jcikA |
bAShpikA kaTutIkShNoShNA kRumishleShmaharI sarA ||60||
tadvacca rAjikA rucyA dIpyakaH koShThashUlanut |
puMstvaghnaH kaTutIkShNoShNo bhUstRuNo vaktrashodhanaH ||61||
kharAhvA kaphavAtaghnI bastirogarujApahA |
kaShAyatiktamadhuraM hRudyaM rocanadIpanam ||62||
dhAnyakaM kAsatRuTchardishamanaM cakShuShorhitam |
bha~ggA kaphaharI tIkShNA grAhiNI dIpanI laghuH ||63||
tIkShNoShNA pittalA mohamadakRud vahnivardhanI |
jambIraH pAcanastIkShNaH kRumivAtakaphApahaH ||64||
surabhirdIpano rucyo mukhavaishadyakArakaH |
pArshvashUlArucishvAsakAsahikkAnilApahaH ||65||
surasaH pittakRudvAtakRumidaurgandhyanAshanaH |
shothavidradhigaNDaghnI kRuShNagandhA kaphApahA ||66||
madhushigruH sarastiktaH shothaghno dIpanaH kaTuH |
uShNo~ashmarIharo bhedI varuNo~anilashUlanut ||67||
pAribhadro~anilashleShmashothamehakRumI~jjayet |
bilvamUlaM marucchleShmachardighnaM na ca pittakRut ||68||
pATalA kaphavAtaghnI kaTva~ggaM grAhI dIpanam |
kaShAyaM madhuraM tiktaM kAshmaryaM ca kaphApaham ||69||
shothanudvahnimanthashca hito vAtavikAriNAm |
eraNDamUlaM shUlaghnaM vRuShyaM vAtaharaM param ||70||
vRuShyastrikaNTako balyo vAtaghno mUtrakRucchrajit |
uShNA vAtakaphashvAsakAsaghnI kaNTakArikA ||71||
pAcanI grAhiNI soShNA vAtaghnI bRuhatI tathA |
pRushniparNI sthirA caiva pittashleShmAtisAriNAm ||72||
pAnabhojanasaMskAre shasyate vAtabhUyasAm |
vAtapittApahaM grAhi vRuShyaM balyaM balAtrayam ||73||
snigdhaM madhuramAyuShyaM mahatI mUtrakRucchrajit |
kShatakShINahitA vRuShyA balyA nAgabalAdhikA ||74||
balyAshvagandhA vAtaghnI kAsashvAsakShaye hitA |
shvAsakAsaharI svaryA jIvantI kShayanAshinI ||75||
mAShaparNI mahAvRuShyA cakShuShyA mudgaparNikA |
RuddhirbalyA tridoShaghnI shuklA ca madhurA guruH ||76||
vRuddhirgarbhapradA shItA vRuShyA kAsakShayApahA |
kAkolIyugalaM shItaM shuklaM ca madhuraM guru ||77||
jayet samIradAhAsrapittashoShatRuShAjvarAn |
jIvakarShabhakau balyau shItau shukrakaphapradau ||78||
harataH pittadAhAsrakArshyaMshoShakShayApahau |
medAyugmaM guru svAdu vRuShyaM stanyaM kaphAvaham ||79||
bRuMhaNaM shItalaM pittaM raktAyAsasamIrajit |
aShTavargo~aShTabhirdravyairetairbhavati shukralaH ||80||
bRuMhaNaH pittadAhAsrashoShaghnaH stanyagarbhakRut |
vishAlA kaphavAtaghnI mehakuShThaharI sarA ||81||
sArivA vAtapittAsRugviShamajvaranAshinI |
anantA grAhiNI raktapittaprashamanI himA ||82||
cakShuShyA mUtrakRucchraghnI gundrA pittAsradAhanut |
lodhro~asrakaphapittaghnashcakShuShyaH shothajit saraH ||83||
tadvat shAbaralodhro~api cakShuShyo mRudurecanaH |
madhukaM raktapittaghnaM vraNashodhanaropaNam ||84||
guru svAdu hitaM vRuShyaM cakShuShyaM svaravarNakRut |
prapauNDarIkaM cakShuShyaM shishiraM vraNaropaNam ||85||
ma~jjiShThA kuShThavIsarpashothaghnI varNadA param |
lAkShA bhagnavisarpaghnI balyA tvagdoShanAshinI ||86||
mushalI madhurA vRuShyA vIryoShNA bRuMhaNI guruH |
tiktA rasAyanI hanti gudajAnyanilaM tathA ||87||
dvidhA shatAvarI j~jeyA kaNTakairadharottaraiH |
dvividhA tu bhaved grAhyA guNaisteShAM na saMshayaH ||88||
shItA kaShAyamadhurA pathyA vRuShyA rasAyanI |
vAtapittavibandhaghnI varNaujobalavardhanI ||89||
pArthaH pathyaH kShate bhagne raktastambhanahRudrujoH |
asthibhagne~asthisaMhAro hito balyo~anilApahaH ||90||
cakShuShyo mArkavaH keshyaH kaphapANDvAmayApahaH |
kaphAmakAmalAshothakRumighnI droNapuShpikA ||91||
shothaghnI vishadA kaNThyA~anilaghnI girikarNikA |
kAsajid vAtashamanI vRushcikAlI viShApahA ||92||
dugdhikoShNA gururvRuShyA vAtalA garbhakAriNI |
svAdurviShTambhinI vRuShyA kaphakuShThakRumI~jjayet ||93||
ahiMsrA viShashothaghnI tadguNaishca sudarshanA |
kAsashvAsaharI pha~jjI gu~jjA kuShThavraNApahA ||94||
jayantI viShadoShaghnI sairIyaH kaphavAtajit |
vAtaraktaharI soShNA vRuShyA balyA prasAraNI ||95||
AmavAtAnilAsraghnau kokilAkSha kulAhalau |
halinI karavIrashca kuShThaduShTavraNApahau ||96||
kukurundaH kaTustikto jvararaktakaphApahaH |
syAnnAgadamanI vRuShyA lUtAsarpaviShApahA ||97||
UrdhvAdhaH kaphapittaghnI kuShThamAvartakI haret |
koshAtakI kaphArshoghnI pakvAmAshayashodhanI ||98||
medhyA jyotiShmatI tIvrA vraNavisphoTanAshinI |
vayasaHsthApanI brAhmI medhAyuHsmRutivardhanI ||99||
kaphavAtAmabhUtaghnI vacAyuHsmRutibuddhidA |
sha~gkhapuShpI sarA tiktA medhyA kRumiviShApahA ||100||
mAlatI kaphapittAsrarugvraNakRumikuShThanut |
cakShuShyaM mukulaM tasyAstatpuShpaM kaphapittanut ||101||
shirISho viShavIsarpasvedatvagdoShashothajit |
dhattUro madavarNAgnivAntikRujjvarakuShThanut ||102||
uShNo gurUrvraNashleShmakaNDUkRumiviShApahaH |
sikthakaM vraNavIsarpakuShThavAtAsrajit param ||103||
raktapittaharI dUrvA kaNDUtvagdoShanAshinI |
pANDumehApacIpittatvagdoShaviShajinnishA ||104||
kaphapittaharI shothakaNDUduShTavraNApahA |
tadvad dArvI visheSheNa kaphAbhiShyandanAshinI ||105||
tvagdoShamArutashleShmaviShaprashamanaM smRutam |
avalgujaphalaM tadvat prapunnATasya cocyate ||106||
kuShThagulmodarArshoghnaM kaTupAki tathaiva ca |
kara~jjakiMshukAriShTaphalaM jantupramehanut ||107||
rUkShoShNaM kaTukaM pAke laghu vAtakaphApaham |
tiktamIShadviShahitaM viDa~ggaM kRuminAshanam ||108||
AsphotA viShakuShThaghnI, tinisho dAhapittanut |
asanaH kaphapittaghnaH, shiMshapA dAhashothanut ||109||
dhAtakI raktapittaghnI, kadaro dantadArDhyakRut |
AphUkaM shoShaNaM grAhi shleShmaghnaM vAtapittalam ||110||
vRuShyo balyaH khasatilaH shleShmaghno vAtajid guruH |
valkalastatphalodbhUto rUkSho grAhI vishoShaNaH ||111||
apAmArgo~agnikRuttIkShNaH, sinduvAro~anilApahaH |
vaMsho vraNAsrasaMhAro bhedanaH shothanAshanaH ||112||
rohItako yakRutplIhagulmodaraharaH saraH |
shothAmakaphavAtaghno vRuddhadAro rasAyanaH ||113||
bhUrje vraNakaphAsraghnastagaraH kuShThavad guNaiH |
kaphavAtaharI krauntI dIpanI na ca pittakRut ||114||
shatAhvA kuShThatagarasuradAruhareNavaH |
elailavAlusaralatvagvyAghranakhacorakAH ||115||
laghUShNAH kaTukAH pAke kaphavAtanibarhaNAH |
shrIvAsaH saralo bolaH kundururgranthiparNakam ||116||
turuShkaM sihlakaM spRukkA gundrA sarjau murA nakham |
sarve~ami pAvanA~alakShmIrakShoghnA jvaranAshanAH ||117||
svAdutiktarasAyuShyAH svedadaurgandhyanAshanAH |
pittAsraviShatRuDdAhaklamaghnaM guru rUkShakam ||118||
sarvaM satiktamadhuraM candanaM shishiraM param |
manoj~jaM candanaM shvetaM raktapittaviShApaham ||119||
hRudyaM prahlAdanIyaM ca satiktamatishItalam |
cakShuShyaM raktapittaghnaM vraNyaM lohitacandanam ||120||
pata~ggaM tiktamadhuraM raktapittakaphApaham |
padmakaM pittavisphoTajvaradAhaviShApaham ||121||
sevyaM pittAsratRuTsvedadAhadaurgandhyanAshanam |
vAtaghnaM ku~gkumaM coShNaM varNyaM tvagdoShanAshanam ||122||
kastUrI chardidaurgandhyavAtAlakShmImalApahA |
kaTutiktoShNamaguru snigdhaM vAtakaphApaham ||123||
snigdhoShNaM kaTukaM pAke suradArvanilApaham |
kattRuNaM tiktamadhuraM vAtashleShmaviShApaham ||124||
sugandhiH kaTuko hRudyaH, ka~gkolaH kaphavAtajit |
tadvajjAtIphalaM proktaM lava~ggakusumaM tathA ||125||
jAtIkoSho laghustRuShNAkledadaurgandhyajinmataH |
satiktakaTukashcaiva balAsasya vinAshanaH ||126||
karpUraH shItalaH sparshe cakShuShyaH kaphanAshanaH |
pakvAtkarpUrataH prAhurapakvaM guNavattaram ||127||
tatrApi syAd yadakShudraM sphaTikAbhaM taduttamam |
pakvaM ca sadalaM snigdhaM haritadyuti cottamam ||128||
bha~gge manAgapi na cennipatanti kaNAstataH |
kaphadAhAsyavairasyamedaHshothaviShApahA ||129||
elA tRuTchardihRullAsakaNDUpittakaphApahA |
sUkShmailA mUtrakRucchrArshaHshvAsakAsakaphe hitA ||130||
vibandhAnAhashUlaghnaM lava~ggaM bhuktapAcanam |
cakShuShyA mukharogaghnI latAkastUrikA himA ||131||
kaTphalaM mukharogaghnaM kAsashvAsajvarApaham |
shatAhvA~anilahA~a~adhmAnashUlatRuTchardinAshinI ||132||
madhurA pAcanI vRuShyA dAhAsRukpittanAshinI |
phalinI gAtradaurgandhyaraktapittakaphApahA ||133||
shastA shoNitapittAtiyoge gandhapriya~ggukA |
rAsnoShNA vAtashothAmavAtavAtAmayA~jjayet ||134||
pauShkaraM pArshvarukkAsashvAsahikkAjarApaham |
shaTI vAtakaphashvAsakAsajvaraharI matA ||135||
madano vAmanastikto vIryoShNo lekhano laghuH |
rUkShaH kuShThakaphAnAhashothagulmavraNApahaH ||136||
shRu~ggI kaphAnilashvAsakAsahikkAjvarApahA |
varA~ggaM kaphashukrAmavAtaghnaM madhuraM kaTu ||137||
tRuTchardiviShahRullAsakaphapittavisarpanut |
tvagdoShasvedadaurgandhyanAshano nAgakesharaH ||138||
patrakaM kaphavAtArshohRullAsArocakApaham |
tAlIshapatraM tIkShNoShNaM kaphakAsakShayApaham ||139||
kaShAyA madhurA rUkShA kAsaghnI vaMsharocanA |
tagAkShIrI kShayashvAsakAsaghnI madhurA himA ||140||
vAsakaH kAsavaisvaryaraktapittakaphApahaH |
kumArI bhedanI shItA yakRutplIhakaphajvarAn ||141||
nihanti vahnivisphoTapittaraktatvagAmayAn |
balyA~amRutA tridoShaghnI grAhiNyuShNA rasAyanI ||142||
dIpanI jvaratRuTchardikAmalAvAtaraktanut |
jarAjit pANDurogaghnaH kShayakuShThajvarApahaH ||143||
lekhano mAkShiko dhAtuH suvarNarajataprabhaH |
madhuro~amlaH kaTuH pAke ki~jciduShNo~amRutopamaH ||144||
mehonmAdAshmarIshothakuShThApasmArasharkarAH |
hanyAcchilAjatu kShipraM kaTupAkaM rasAyanam ||145||
sarvadoShaharaM yogavAhi cAnuShNashItalam |
vishado gairikaH snigdhaH kaShAyo madhuro himaH ||146||
suvarNagairikaM tadvaccakShuShyaM tad visheShataH |
tutthakaM kaTu sakShAraM kaShAyaM vishadaM laghu ||147||
lekhanaM bhedi cakShuShyaM kaNDUkRumiviShApaham |
kaphaghnI tiktakaTukA manohvA lekhanI sarA ||148||
snigdhaM kaShAyaM kaTukaM haritAlaM viShapraNut |
kaShAyaM madhuraM shItaM lekhanaM snigdhama~jjanam ||149||
raktapittaviShacchardisidhmaghnaM dRukprasAdanam |
sroto~jjanaM varaM tatra tataH sauvIrakA~jjanam ||150||
kaphajaM tiktakaTukaM chedi soShNaM rasAyanam |
pAradaH kRumikuShThaghnaH cakShuShyo~atha rasAyanaH ||151||
abhraM guru himaM balyaM kuShThamehatridoShanut |
hi~ggulaM pittakaphanuccakShuShyaM viShakuShThanut ||152||
gandhakaM kRumikuShThaghnaM viShanetrAmayApaham |
cakShuShyaM shvetamaricaM, cakShuShyA pItarohiNI ||153||
sakShAra uShNavIryashca kAco dRuShTikRuda~jjanAt |
vandAkaH kaphavAtAsrarakShovraNaviShApahaH ||154||
kAshIshadvayamamloShNaM tiktaM keshyaM dRushorhitam |
hanti kaNDUviShashvitramUtrAghAtakaphAnilAn ||155||
laghusha~gkhAdayaH shItAH (netradoShApahAH smRutAH) |
sha~gkhodadhimalau shItau kaShAyAvatilekhanau ||156||
muktAvidrumavajrendravaiDUryasphATikAdikam |
maNiratnaM saraM shItaM kaShAyaM svAdu lekhanam ||157||
cakShuShyaM dhAraNAttattu pApAlakShmIviShApaham |
kaShAyaM tiktamadhuraM suvarNaM guru lekhanam ||158||
hRudyaM rasAyanaM balyaM cakShuShyaM kAntidaM shuci |
AyurmeghAsmRutisthairyavAgvibhUtimatipradam ||159||
kShayonmAdagadArtAnAM shamanaM paramucyate |
rUpyaM snigdhaM kaShAyAmlaM vipAke madhuraM saram ||160||
vayasaHsthApanaM shItaM lekhanaM vAtapittajit |
tAmraM satiktamadhuraM kaShAyaM lekhanaM laghu ||161||
kaTupAkarasaM shItaM ropaNaM kaphavAtajit |
kAMsyaM kaShAyAnurasaM vishadaM lekhanaM saram ||162||
dRuShTiprasAdanaM rUkShaM tiktaM pittakaphApaham |
satiktalavaNaM chedi pANDutvakRumivAtanut ||163||
lekhanaM pittalaM ki~jcit trapu sIsaM ca tadguNam |
kRuShNAyaH shothashUlArshaHkuShThapANDutvamehanut ||164||
vayasyaM guru cakShuShyaM saraM medogarApaham |
yallohaM yadguNaM proktaM tatkiTTamapi tadguNam ||165||
kiTTAd dashaguNaM muNDaM muNDAttIkShNaM shatonmitam |
tIkShNAllakShaguNaM kAntaM tasmAt kAntaM samAharet ||166||
sindUramuShNavIryaM ca kuShThapANDuviShApaham |
bhagnasandhAnajananaM vraNashodhanaropaNam ||167||
kaphapittaviShArtighnI saurAShTrI vraNashodhanI |
pa~gkaH pittAsradAhaghno bhagnakShatahito himaH ||168||
keshyo hastimadashcittarajano viShanAshanaH |
sarpapittamapasmArakuShThaduShTavraNApaham ||169||
cakShuShyaM kaTutIkShNoShNamunmAdakRuminAshanam |
gorocanAtima~ggalyA viShAlakShmIgrahApahA ||170||
kaShAyaM madhuraM shItaM padmaM pittakaphAsrajit |
tadvat bakulapunnAgakahlArotpalapATalam ||171||
sacampakaM tato nyUnaM guNaiH kauraNTakiMshukam |
kumudotpalanAlAshca sapuShpAH saphalAH smRutAH ||172||
shItAH svAdukaShAyAshca kaphamArutakopanAH |
shaNasya kovidArasya karbudArasya shAlmaleH ||173||
puShpaM grAhi prashastaM ca raktapittavishoShaNam |
bandhUkaM shleShmalaM grAhi tadvadeva ca yUthikA ||174||
raktapittAtisAraghnaM dhAtakIkusumaM himam |
mucakundaM shirortighnaM pittAsraghnaM mahAguNam ||175||
vAtaghnI mallikA tiktA ra~jjanI stambhanI japA |
vRuShagastikayoH puShpaM tiktaM pittakaphApaham ||176||
kShayakAsApahaM pAke kaTukaM vAtakopanam |
kaphaghnaM ketakaM tiktaM shairIShaM viShahAri ca ||177||
|