|
athAto vedotpattimadhyAyaM vyAkhyAsyAma iti| nanu, katamat sUtramidaM? caturvidhAni hi sUtrANi bhavanti; tadyathA- pratisaMskartRusUtram, ekIyasUtraM, shiShyasUtraM, gurusUtraM ceti| iha pratisaMskartRusUtraM nAstyevetyeke, anye tvastIti bhAShante, yathA ca tadasti tathehaiva naikaTyena kathayiShyAmaH; ekIyasUtraM yathA- ‘tatra lohitakapilapANDupItanIlashukleShvavanipradesheShu madhurAmlalavaNakaTutiktakaShAyANi yathAsa~gkhyamudakAni bhavantItyeke bhAShante’(sU. a. 45)- iti; shiShyasUtraM yathA- ‘vAyoH prakRutibhUtasya vyApannasya ca lakShaNam| sthAnaM karma ca rogAMshca vadasva vadatAMvara’ (ni. a. 1)- iti; gurusUtraM yathA- ‘dehe vicaratastasya lakShaNAni nibodha me’ (ni. a. 1)- iti; evaM sUtrANAmanekatvAt kasyedaM sUtram? ucyate- gurorevaitat sUtraM, shiShyeNa granthaM cikIrShatA likhitam| anye tu shiShyasyaivedaM sUtramityAhuH, sa tvAtmashiShyeShu dhanvantariprashiShyeShu pratij~jAM kRutavAn; tannecchati gayI| kimetat svakapolakalpitaM sushrutenoktam, athavA yathaiva guruNodIritamiti pRuShTaH pratisaMskartA sushrutamukhenedamAha- yathovAca bhagavAn dhanvantaririti| idaM pratisaMskartRusUtraM, yatra yatra parokShe liTprayogastatra tatraiva pratisaMskartRusUtraM j~jAtavyamiti; pratisaMskartA~apIha nAgArjuna eva| athashabdo~anantarArtha eva| ato yuShmacchalyatantropadeshakAmitAdanantaram| vedotpattimiti asyAdau AyuHshabdo lupto j~jeyaH; tena, Ayurvedotpattimiti| utpattiratrAbhivyaktiH, na tvabhUtaprAdurbhAvaH| adhIyante~asminnarthA ityadhyAyaH| vyAkhyAsyAma iti virvisheShe, A~g abhivyAptau, vyAkhyAsyAmaH prakathayiShyAmaH| anye tu, athashabdaH shiShyaprashnAnantarye [] , ataHshabdo hetvarthaH, yata ete shiShyAH prajAhitArthamAyurvedaM guruM papracchuH, ato hetorityarthaH; apare tu virvividhaprakAre, A~g Abhimukhye, sheShaM samam| etenAtaH shalyatantropadeshakAmitAdanantaram, AyurvedAbhivyaktimadhikRutya kRuto yo~adhyAyastaM visheShAbhivyAptyA prakathayiShyAmaH| dvitIyavyAkhyAnapakShe~apItthaM yojanIyam| yathovAceti yAdRuguktavAn| bhagavAn dhanvantaririti samastaishvaryamAhAtmyayashaHshrIkAmArthaprayatnairyukto ‘bhagavAn’ ityucyate; anye tu j~jAnAtishayavAn puruShAtishayo bhagavAn; apare tu, aShTaguNaishvaryavAnevAtra bhagavAn| athAta ityAdikaM pratij~jAsUtraM yadyapyadhyAyAdau likhitaM, tatha~api ‘vatsa sushruta’ (sU. a. 1, sU. a. 14) ityanantaraM draShTavyam; anye tu ‘adhyApyAshca bhavanto vatsAH’ (sU. a. 1, sU. a. 5) ityanantaraM paThanti, tannecchati gayI| atra kecid ‘vedotpattiM nAmAdhyAyaM’ iti paThanti||1-2||
|